-A Haaße mit an Gschissanan, a Semmö und a Sechzehnablech. -Do, bittschee. -Daunke. -… -Au weh! Ui jeh, naa, des deaf do net woa sei! -Wos hom S? Is eana schlechd? Is de Wuaschd z haaß? – Naa, z haaß is net, owa schlechd is ma scho! Ruafns de Rettung, sogns, de Josef Kocourek hom s vagift, den miassn S den Mogn auspumpn. Wos is denn des fia r a Zeig fia r a grauslichtes? Des kau jo kana essn! Des is do ka Haaße net! -Owa jo, kloa des is a Haaße, owa a vegedarische. -Moch kane Schmäh! -Schmähohne. Wissen S des net? Mia woan do groß in Beziaksblod: Der erste vegetarische Würstelstand von Wien. Gö, da schaun S. -Na hea auf! I wü a Haaße, net an Spinod, dea ausschaugt wia r a Haaße. -Des is jo goa ka Spinod. Des is Weizn, Reismöö, Eadapfö und no so a Zeix. -I wüü a Wuaschd, kan Reisauflauf! -Des is owa xinda! Weu Fleisch unxund is, wissen S. Des haaßt s de gaunze Zeid. Neilich hom s as sogoa in Feansehn brocht. Drum hob i ma docht, mox d an vegedarischn Wiaschdlstaund auf. No, und Feadarungen hod s aa gem. -Fia r an vegedarischn Wiaschdlstaund? -Kloa. Fia n „Bioniageist“, hod’s ghaaßn. Und do is s a jetz, mei vegedarischer Wiaschdlstaund. Do schaun S auffe aufs Schüüdl, da steht Vürstel mit Vau vie vedschie, des haaßt vegedarisch. Hom S des net gsegn? -Schoo, owa i hob glaubt, Sie hom sie vaschriam. -Naa, des haaßt, bei mia kriang S Wiaschdl, owa xunde, vastengan S mi? -Xund scho, owa draurich is des trotzdem, sea draurich. Wia be eanare Viaschdl mit Vau. Den Vau, den fööd a Hakal fia r a We, daun warat n s richtige Wiaschdl, owa wia den Vau des Hakal zu n We fööd, fööd Eanare Viaschdl mit Vau des Fleisch fia r a Wiaschdl mit W. -Owa xund san s. -Jo eh. Xund san s, weu ma s net essn kau. Und wos ma net isst, des kau an aa net kraunk mochn. Baumgartner, Edwin: Schmäh – die Wiener Antwort auf die Dummheit der Welt, Claudius Verlag, S. 57f]]>
